Dan Hu l-Post li Hekk Se Jibqa’.

Dan hu l-post li hekk se jibqa’

Baqa’ ftit ta’ nifs pulit,

Ġewwa l-art mimlija kosbor

Sema mdennes bil-kubrit.

Dan hu l-post fejn jien se nibqa’,

Hawn maqtuħ hekk isolat

Bogħod min-nies u kull ma jafu,

Għar imħaffer ġewwa l-blat.

Eremit li baqa’ waħdu

Ma mexiex maż-żminijiet,

Għax il-kaos baqa’ jikber,

Baqa’ jdardar l-ilmijiet.

Dan hu l-post li fih ser nibqa’

Ma nisma’ aħbarijiet,

Kull ma nara u kull ma nisma’

Mimli kollu għawġ u nkwiet.

Alfred Grech

San Lawrenz 15/06/2016